Qoyma
***
Allah bu nə gündür bu nə zülümdür
Yalan ayaq tutub yeriyir qoyma
Salıb ayaq altına yaxşını yaman
Tutub saçlarından sürüyür qoyma
İtib xətir-hörmət zaman qarışıb
Bu gündən sabaha güman qarışıb
Maya da toxum da yaman qarışıb
Köhləndən yabılar törüyür qoyma
Ömürə xəzan gəlir vaxtsız vədəsiz
Daha ürək yoxdur dərdsiz zədəsiz
Çox uşaq doğulur indi dədəsiz
Biclər hər tərəfi bürüyür qoyma
Hər şey altüst oldu dəyişdi birdən
Təpərli kişilər süşübdür girdən
Qarğalar qartalı salıb zirvədən
Mətləb dərd içində çürüyür qoyma.
Olmaz
***
Varı zəhmət gətirər
Var deməklə var olmaz
Bilki hər dağ başında
Çiskin duman qar olmaz
Tutmaq olmaz köz əldə
Heş qalmasın göz əldə
Hər gördüyün gözəldə
Vəfa ismət ar olmaz
Yıxılana əl yetir
Qəlblərə sevinc gətir
Hər çiçəkdə xoş ətir
Hər budaqda bar olmaz
Eli sənə güldürər
Zirvələrdən endirər
Ocağını söndürər
Vəfasızdan yar olmaz
Görün xeyirdə şərdə
Hər an arxa dur mərdə
Sirri demə namərdə
Onda etibar olmaz
Yaşamaq olar varsız
Ömür sürmə mənasız
Mətləb yurdsuz yuvasız
Quşda bəxtiyar olmaz.
Ellər apardı
*****
Deyirəm ağardı vaxtsız vədəsiz
Saçımın qarasın illər apardı
Qəlbimin söhbətin sözün yadigar
Nəsildən-nəsilə dillər apardı
Ürəyimi göz yaşımla dağladım
Ümüdümü bir Allaha bağladım
Gecə gündüz ana deyib ağladım
Gözümün yaşını sellər apardı
Namərdlər əlində yurdum talandı
Xəyanət qəlblərdə gəzdi dolandı
Haqqım ədalətim oda qalandı
Sovurub yelini yellər apardı
Haqsızlar əlindən gəlmişəm zara
Haqqı sevənlərim düşübdür dara
Bir gün eşidərsüz soyuq məzara
Mətləbi çiynində ellər apardı.
ÖZ QANIYLA YUYULMASA-DÜZƏLMƏZ
**************
Deyirsən ki,işlər nə vaxt düzələr
Sular başdan durulmasa,düzəlməz
Kötüyündən əyri,quru agaclar
Bircə-bircə qırılmasa, düzəlməz
Qaldırırlar başa yaltaq,yalagı
Vuran elə əyri vurur calagı
Əyri məmurların uzun qulagı
Haqq əlilə burulmasa,düzəlməz
Gör necə məhv olur arzu,gümanlar
Qalxır yerdən göyə ahlar,amanlar
Bu namərdlər,şərəfsizlər,yamanlar
Əməlindən yorulmasa,düzəlməz
Hər kəsə istidi öz ocaqında
Mənim də közüm var söz ocaqında
Əyrilər,yaltaqlar düz ocaqında
Yana,yana qovrulmasa,düzəlməz
Elə oynayırlar fitnə-kələklə
Çirkab dolu daşa dönmüş ürəklə
Satqınların əsli,kökü küləklə
Yerdən göyə sovrulmasa,düzəlməz
Mətləb bizi soğan kimi soyanlar
Haqqı görənlərin gözün oyanlar
Millətimi yaman günə qoyanlar
Öz qanıyla yuyulmasa,düzəlməz.
Qorxudan
*****
Tülkülər çaqqallar özəlləşdirib
Pələng həsrət qalıb çölə qorxudan
Əldən-ələ keçir hələ haçmamış
Bülbül könül vermir gülə qorxudan
Bu gündən sabaha gümanı yoxdur
Yeyib yaşamağa samanı yoxdur
Tullanım sürməyə amanım yoxdur
Dügə yan çevirmir kələ qorxudan
Qara yaxdıq təmiz adın üstünə
Çörəkçün qaçırıq yadın üstünə
Su töküb söndürdük odun üstünə
Yaman baş əyirik külə qorxudan
Mətləb yurd yuvamı oda salıbdır
Əslinin oduna Kərəm yanıbdır
Vətənimdə əsli-nəsli qalıbdır
Səsin çıxardammır Lələ qorxudan.
Oxunub: 1 497
