Yenə də göy üzü qaraldı , göy üzündə qaralmış buludlarda şəhidinə yas tutdu. Dolmuş göy üzü hönkürtüylə ağlamaq istəyirdi, amma boğularaq durmuşdu. Təskinliyi isə şəhidlik zirvəsi idi.
Bütün yüksəkliklərdən ucada dayanan bir zirvə var: Şəhidlik zirvəsi. Bu zirvəyə qalxmaq hər kəsə nəsib olmur. Yalnız müqəddəs amallar uğrunda çarpışan, qorxu nə olduğunu bilməyən, Vətən və xalq yolunda canını fəda etməkdən çəkinməyən cəsarətli, ləyaqətli insanlar yüksələ bilərlər bu uca zirvəyə.
Bu yüksəkliyə ucalan insanlar ölmürlər, əksinə ölümləri ilə bir əbədilik qazanırlar. Qəlblərdə yaşayanlar isə ölmürlər. Polkovnik Rahim Əliyev onlardan biridir.
Azərbaycan Silahlı Qüvvələrinin polkovniki 26 il orduda xidmət edən Əliyev Rahim Əhməd oğlu xidməti vəzifəsini icra edən zaman şəhid olub.
Qeyd edək ki, polkovnik Rahim Əliyev aprel döyüşlərində fəal iştirak edib. Lələtəpə yüksəkliyinin azad olunmasında da polkovnik Rahim Əliyevin xüsusi rolu olub.
O, da bir çox şəhidlərimiz kimi ölümü ilə əbədilik qazandı. Polkovnik Rahim Əliyev bir evdən getmədi o, elin oğlu idi, eldən getdi.
Almaz İlahə Əhmədova
