“KTMT Baş katibi Stanislav Zasın Ermənistan Təhlükəsizlik Şurasının katibi Armen Qriqoryana göndərdiyi məktubdan da görünür ki, əslində müharibə barədə Nikol Paşinyana qabaqcadan xəbərdarlıq edilib”.
KONKRET.az xəbər verir ki, bu barədə oğlu İkinci Qarabağ müharibəsi zamanı itkin düşmüş sayılan politoloq Qeqam Nazaryan özünün facebook səhifəsində yazıb.
O statusunda daha sonra bunları bildirib: “Üç aydır gecə yatmıram, üç aydır on minlərlə digər soydaşımız gecə yata bilmir. Üç aydır bu fəlakətin qarşısını ala bilmədiyimiz üçün özümüzü bağışlaya bilmərik. İndi Mikael Minasyan KTMT Baş katibi Stanislav Zasın Ermənistan Təhlükəsizlik Şurasının Baş katibinə yazdığı məktubunu dərc edəndə hələ bundan sonra da uzun müddət yata bilməyəcəyimizi başa düşdük.
KTMT-də ən yüksək səviyyədə qanlı, faciəli, fəlakətli müharibədən dörd həftə əvvəl xəbərdarlıq edilib. Üstəlik, bu fəlakətin qarşısını almaq üçün nələrin edilməsi lazım olduğuna işarə ediblər.
Xəbərdarlıq etsələr də Nikol Silahlı Qüvvələrin Baş Qərargah rəisi Onik Qasparyanın iyun ayında etdiyi çağırışlara qulaq asmayıb, həm də Stanislav Zasın məktubuna məhəl qoymayıb. Yaxşı bəs nədən Nikol müharibəni seçdi?
Daha səmimi olaq: Nicol uşaqlarımızı öldürmək variantını seçdi, uşaqlarımızı əlil etmək, onları ələ keçirmək, Şuşanı azərbaycanlılara təslim etmək variantını seçdi.
Nikol, necə rahat yatmaq və ya gəzmək, danışmaq olar? KTMT Baş katibinin bu məktubu dərc edildikdən sonra Milli Təhlükəsizlik Xidmətinə getməli və tutulmağını istəməlisən. Hələ etməmisən, amma etməli olacaqsan. Başqa bir seçimin yoxdur.
Artıq hamıya aydındır: müharibənin qarşısını ala bilərdin, ən azı beş min insanı xilas edə bilərdin, on min nəfərin əlil olmasına səbəb olmazdın, Hadrut və Şuşa, Berdzor (Laçın) və Karvaçarı (Kəlbəcəri) təslim etməzdin.
Ağır yaralanan, lakin möcüzəvi şəkildə sağ qalan 18 yaşlı gənclərin gözlərindəki ifadələri gördünmü? Görmədin, görə bilmədin. Görsəydin, tutulmağını, həbs olunmağını istəyərdin.
Gecə yatmaq mümkün deyil, uzun müddət yatmayacağıq, amma bir yaxın dostumun dediyi kimi, oğullarımızın adına möhkəm dayanmalıyıq, çünki oğullarımızın adına hələ çox işlər var.
Biz davam edəcəyik. Biz mütləq davam edəcəyik. Yaxın iki gün ərzində vacib bir qərar verdiyimi açıqlayacağam”.
Oxunub: 762
