Belarusun paytaxtı Minskdə keçirilən II Avropa Oyunlarının üçüncü gününə yekun vurulub.
APA-nın Minskə ezam olunmuş əməkdaşının məlumatına görə, yarışın arxada qalan hissəsində 62 dəst medal sahibini tapıb.
Rusiya milli komandası medal siyahısında liderdir. Şimallılar 19-u qızıl olmaqla 39 mükafata yiyələniblər.
Meydan sahibləri 2-ci, Ukrayna 3-cü pillədə qərarlaşıb. Ümumilikdə isə 50 iştirakçı ölkədən 32-si mükafatçılar sırasına düşməyi bacarıb. Bunlardan 19-u çempionluq sevinci də yaşayıb.
Azərbaycan yığması qızıl medal qazanmayan ölkələr arasında liderdir. Ümumi siyahıda 20-ci olan komandamız bir gün öncə olduğu kimi iyunun 23-də də hesabına 4 medal yazdırıb.
Ümumilikdə 8 dəfə mükafat əldə edən təmsilçilərimiz dörd gümüş və dörd bürünc qazanıblar. Bu uğurlar üç növdə gerçəkləşib. İdman akrobatikasında iki gümüş və bir bürünc, samboda bir gümüş və iki bürünc, cüdoda isə bir gümüş və bir bürünc əldə olunub
Oxunub: 631
