“Prezident İlham Əliyevin imzaladığı müvafiq Sərəncama əsasən, Qaradağ rayonunun Ələt, Korgöz və Lökbatan qəsəbələri ərazisində avtomobil yollarının yenidən qurulması işlərinin davam etdirilməsi nəzərdə tutulub. Bu mühüm sənəd Qaradağda uğurla davam etdirilən yol-nəqliyyat infrastrukturunun bərpası və yenidən qurulması sahəsində əlavə tədbirlərin həyata keçirilməsi deməkdir və sözügedən rayonun soisla-iqtisadi inkişafına töhfə verəcək. Qaradağda sürətlə aparılan yenidənqurma və əsaslı tikinti-bərpa işlərinin miqyasca böyüməsinə səbəb olmaqla, rayonun bütün yaşayış məntəqlərinin abadlaşdırılmasını və insanların zəruri sosial infrastrukturlarla təmin edəcək”. Bu barədə Milli Məclisin İqtisadi siyasət, sənaye və sahibkarlıq komitəsini üzvü Aydın Hüseynov bildirib.
A.Hüseynovun sözlərinə görə, Qaradağ güclü sənaye rayonu kimi ölkə iqtisadiyyatında mühüm yer tutur və son illərdə bu rayonun sənaye potensialının artırılması və səmərəli istifadəsi ilə bağlı məqsədyönlü iqtisadi proqramlar həyata keçirilməkdədir. Ələt qəsəbəsində Bakı Beynəlxalq Dəniz Ticarət Limanının salınması rayonun iqtisadi gücünü və regional tranzit mövqeyini artırıb. “Qaradağ rayonu hazırda Azərbaycanın ən strateji logistika-nəqliyyat mərkəzlərindən biri hesab edilir və coğrafi baxımdan tranzitlərin qovşağıdır. Bir müddət əvvəl dövlət başçısı Qaradağ rayonu ərazisində Qaradağ Sənaye Parkı yaradılması haqqında da sərəncam imzalayıb və məqsəd müasir texnologiyalara əsaslanan rəqabətqabiliyyətli sənaye məhsullarının istehsalı, qeyri-neft ixracının təşkili və güclü sahibkarlıq sektorunun yaradılmasından ibarətdir”.
Aydın Hüseynov bildirib ki, hazırda Qaradağda yaradılan ən müasir və innovativ iqtisadi model olan Azad ticarət zonası tipli Xüsusi iqtisadi zonanın təşkili ilə bağlı kompleks içlər sürətlə davam etdirilir. “Bu layihə həm Qaradağ rayonunun, həm də respublikamızın iqtisadiyyatın davamlı inkişafı və rəqabət qabiliyyətinin artırılmasında, Azərbaycanın logistika və nəqliyyat mərkəzi kimi mövqeyinin gücləndirilməsində çox mühüm rol oynaycaq, sahibkarlığın və iqtisadiyyatın inkişafını sürətləndirəcək. Xüsusi iqtisadi zona ölkədə sosial-iqtisadi inkişafın sürətləndirilməsi üçün xarici sərmayənin və mütərəqqi texnologiyaların cəlb olunması, qabaqcıl idarəetmə təcrübəsinin tətbiqi və yayılmasında da əhəmiyyətli rol oynayacaq. Bu baxımdan Qaradağ rayonu ərazisində beynəlxalq nəqliyyat qovşaqlarının yerləşdiyi ərazinin seçilməsi mühüm əhəmiyyət kəsb edir və bu layihənin həyata keçirilməsi iqtisadiyyatın inkişafına töhfə verəcək, texnoparklarla bağlı layihələrin miqyasının artmasına, bu sahəyə investorların axınına, yeni iş yerlərinin yaradılmasına və son nəticədə məşğul əhalinin sayının artımı fonunda insanların sosial rifahının yaxşılaşmasına səbəb olacaq. Yeni vergi rejimi, həmçinin, terxnoparklarda yüksək texnologiyalar əsasında rəqabətqabiliyyətli sənaye məhsullarının istehsalının və ixracınının güclənməsinə imkan verəcək”.
Millət vəkili qeyd edib ki, Cənab Prezident üçün əziz və doğma olan Qaradağ rayonu hazırda özünün sürətli inkişafının yeni mərhələsinə daxil olub. Dövlət başçısının diqqət və qayğısı, birbaşa təşəbbüsü və himayəsi sayəsində son illər Qaradağ rayonunda bütün infrastrukturlar müasirləşir, yol-nəqliyyat, sosial obyektlərin inşası genişlənir, rayonda ən müasir sənaye və mühüm istehsal, emal, xidmət obyektlərinin tikintisi uğurla aparılır. //arazmedia.az//
