Psixoloqlara tənqid: Çarəsi olmayan xəstəlikləri “müalicə edirəm” deyirlər
30-03-2019, 12:05. Разместил: djbaz
“Psixoloji yardım haqqında” qanun tam işlək vəziyyətdə olanda, istər psixoloqlarla, istər defektoloqlarla bağlı məsələlərin, oradakı müddəaların, tələblərin hamısına riayət olunmalıdır.Həmişə bu yöndə dediyim sözün məğzi də ondan ibarət olub ki, istər psixoloqlar, istər defektoloqlar təcrübəli adamlar olmalıdırlar.
Yəni, öz ixtisasları ilə bərabər, həm də tibbi savada malik insanlar olmalıdırlar.
Djb.az xəbərt verir ki,bunu Oxu.Az-a açıqlamasında millət vəkili, BDU-nun professoru Kamilə Əliyeva deyib.
“Müşahidə etmişəm, hər dəfə müxtəlif psixoloji yardım adı altında fəaliyyət göstərən mərkəzlərin qarşısından keçəndə görmüşəm ki, elə xəstəliklərin adlarını yazıblar ki, əslində onların çoxu müalicəsi mümkün olmayan xəstəliklərdir.
Məsələn, autizm, daun sindromu və sair. Biz çoxumuz həkim olmasaq da, yaxşı bilirik ki, bunların çarəsi hələlik tapılmayıb” - deyən millət vəkilinin sözlərinə görə, xüsusilə də, tibbi savadı olmayan insanların psixoloq adı altında bu xəstəliklərin “müalicə”sini öz üzərinə götürməsi tam yolverilməz və qəbuledilməzdir.
“Yəni, elə xəstəliklər, elə xəstə uşaqlar var ki, məsələn, onlara fizioterapiya, hansısa idman növü qəti olmaz və sair.
Amma bəzi “psixoloqlar” tibbi savadları olmadan, kor-koranə bu işləri görürlər, psixoloqluq, defektoloqluq edirlər. Defektoloqluq elədir ki, onlar nitqlə məşğul olurlar. Bu baxımdan, onlar o qədər də psixoloji məqamları tuta bilməzlər.
Amma hər halda bu insan obyektidir, xüsusilə, uşaqlarla bağlı incə, həssas məsələdir. Bunlarla çox incə məşğul olmaq lazımdır ki, əksinə, fəsadlaşmış formada meydana çıxmasın, təzahür etməsin.
Bəzən olur ki, gedirlər hardasa kurs keçirlər. Sertifikatlar da asırlar və yazırlar ki, guya 45 saat, 60 saatlıq kursu bitiriblər.
Həmin o 45 saat, 60 saatlıq kursu keçməklə, gəlib o “təcrübə”ni insan, uşaqlar üzərində sınayırlar ki, bu, çox təhlükəli və qorxuludur.
Ona görə də mütləq tibbi savadı olan insanlar psixoloqluqla məşğul olmalıdır, özü də onlara ciddi nəzarət həyata keçirilməlidir.
Dövlətin nəzarətində olanlar aydındır, dövlət özü tənzimləyir bu məsələni.
Ancaq özəl sektorda onlara kim nəzarət edir, bu məsələ açıq qalır və nəticə etibarı ilə istər-istəməz insanlarda ciddi narahatlıqlar doğurur.
Hətta, mənim bildiyim qədər psixoloji mərkəzlərin rəhbərləri belə, özləri tamam başqa sahənin mütəxəssisləridirlər.
Ona görə də bu işlərə bir az daha ciddi yanaşmaq tələb olunur”, - deyə K. Əliyeva sözlərinə əlavə edib.
Вернуться назад