“Mitinq keçirmək üçün müxalifətə Bakı şəhəri, Qaradağ rayonunun Lökbatan qəsəbəsində yer ayrılıb. Müxalifət qanun çərçivəsində bu ərazidə sərbəst toplaşmaq hüququndan istifadə edə bilər”. Bu fikirləri Baş nazirin müavini, YAP Sədrinin müavini-İcra katibi Əli Əhmədov deyib.
Əli Əhmədov bildirib ki, Lökbatan da Bakı şəhərinin ərazisidir və bunu müxaliflər də bilir: “Sadəcə, onlar mitinqi insanların kütləvi olduğu yerdə keçirmək, bununla da özlərinin sosial bazalarının guya geniş olduğunu göstərmək istəyirlər. Mitinq keçirmək üçün ən yaxşı yer stadion olar. Nə qədər adamları var, Lökbatana stadiona dəvət etsinlər, mitinqlərini keçirsinlər. Müxalifət Lökbatan qəsəbəsinin uzaq olduğunu bəhanə gətirməməlidir. Mən hesab etmirəm ki, Lökbatan uzaqdır. Qeyd etmək istəyirəm ki, biz YAP olaraq, vaxtilə həmin stadionda mitinqlər keçirmişik”.
“Milli şura” adlandırılan qurumun oktyabrın 8-də Bakı Şəhəri İcra Hakimiyyətinin inzibati binasının qarşısında razılaşdırılmamış piket keçirmək barədə qərarına münasibət bildirən Əli Əhmədov qeyd edib ki, icazəsiz aksiya keçirmək qanunsuz hərəkətdir. Ona görə də bunu etmək olmaz.
Oxunub: 488
